حوار مع ميت

ايه لسه بتحلم تعيش

مين قال اني بحلم

انا الناس كتبت عليه اتحرم من حق الحلم

الناس كتبت عليه مشوفش الفرح

اه يبقى بتحلم انك تموت

يااااااااااااااه

ده منى عيني

يااااه لو ربنا ينولها ليه وبحسن خاتمه كمان دي تبقى احسن حاجة حصلتلي من يوم ما اتولدت

واللي ياما استنيتها كتير

ليه عامل فى نفسك كده علشان ايه ده كله الدنيا مبتقفش علشان حد بيحب حد

انا طول عمري بحسب نفسي غريب على الدنيا دي

علشان كده مش قابل من الاساس انك تطبق عليه اللي بيتطبق على كل الناس

لاني حاسس نفسي مش منهم

ولا عمري كنت منهم

محدش حب ذى ما حبيت

محدش ضحى ذى ما ضحيت

محدش اتمنى الموت وحبه وعشقه علشان مش يشوف حياة مفيهاش حبيبه

ايوة بموت علشانها

وحبيت الموت علشانها

لاني حبيتها اكتر ما حبيت الدنيا

ايه اللي انت بتقوله ده انا مش مصدقك ولا مش مصدق ان فى بنى ادم كده

انا اساسا مش عارف ارد عليك اقول ايه

انت اساسا مش بس مش مصدق

انت مش حاسس ولا فاهم

لانه امر صعب على اي حد يحسه ويفهمه

اما تشوفني وانا كل يوم انام فى سريري واخر دعوة تبقى يا رب ما اقوم من النومه دي

اما تشوفني وانا كل اما اكل ادعي يكون السر الالهي يطلع بعد اللقمة دي

اما تشوف كلمة ااااااه بتطلع وتداري وراها آهات وآهات والم وجرح وعذاب فى جسد بالكامل

مش بس فى القلبي اللي بيحب

اما تشوف حاجات كتير من هذا القبيل

جايز تحسني وتفهمني

اكتب ايه واقولك ايه انت مش انا ولا عمرك هتبقى انا

وانا اساسا متمناش لاي حد فى الدنيا انه يبقى انا

ليه يا حسام بتفكر بالشكل ده ليه مش بتقول انك تقدر تعيش وتبتدي حياة جديدة

ليه مش تفكر ان الفرح ادامك بس انت مش شايفه

ليه مش تبص حواليك وتدور على الفرح فى مكان تاني

بحبها اوي

بحبها اوي

بحبها اوي

على رأي تامر عاشور

اه لو كان دمعي بيتكلم كنت عرفت ان انا بتألم فى بعادك يا أعز الناس

كنت أمنت ان انا مش بايع سارح قلبي فى بعدك ضايع

ده حلال ده ولا حرام قولي اعمل ايه يا غرام الدنيا ليه بتخدني من اجمل الاحلام

اقتنعت من جوايا ان خلاص فى ناس لازم تفرح وفى ناس لازم تقضي حياتها بكى ودموع

اقتنعت من جوايا اني هعيش واموت وانا ذى ما انا الدمعة على خدي

والاه فى قلبي

والجرح فى كل جوراحي

اقتنعت ان القسمة والنصيب كتبت على حسام يعيش مذلول طول ما هو عايش على وش الارض

لانه مش قادر يوصل للحاجة الوحيدة اللي حبها من قلبه واتمناها فى الدنيا دي

اقتنعت من جوايا ان الموت راحة لكتير من الناس وانا اكتر واحد محتاج ليه

بسبب مرض بقى او تعب او اي حاجة فى الدنيا المهم ان راحته جنب اللي خلقه

وكفاية كلام

هقول سلام

سلام

بعد طول اهمال

بعد طول اهمال ردا على بعد طول انتظار

متفكريش ان الكلام ده ليكي يا سمسمة

الكلام موجه للي راح وقال عدولي

الكلام موجه للي خلى الناس تسألني مالي محدش يعرف ايه اللي جرالي

الكلام للي سبني اكوي قلبي بايدي وناري

الكلام كتير والاحاسيس اكتر واكتر

واللي جوه القلب ما يتقدر

الااااااااه بتطلع تقطع من قلبي

وتكتب على ايامي سر احزاني

حبي لحبيبي اللي راح ولا جاشي

سابني مرمي فى نار ولهيب فراقي

يا سلام يا سمسم على الكلام اللي يقطع القلب

اول واحدة جايز تعرف اني بكدب لما اقول ان ده مجرد كلام هي جيجي

لانها جربت وشافت وعرفت الفرق بين الكلام والاحساس

وصلت لمرحلة من الاهمال بقيت انا كمان اهمل نفسي

واقول اشمعنا

يعني هي جات عليه

وصلت لدرجة من الاهمال اني اعيا واتعب وافرح وانبسط بده

مش علشان الناس تهتم فيه ذى ما كنت بتمنى قبل

لا

المرة دي علشان اثبت لنفسي اني فعلا مهمل من كل اللي حواليه

احساس غريب صعب يحسه غيري

لما ابقى مرمي فى سريري

محدش يفكر يرفع سماعة التليفون ويقولي مالك يا سمسم

هو ده فعلا موضوعي

وهو ده احساسي

اسف على العودة من بعد طول اهمال

لانها عودة بلا عودة

واللي ليه بالي وخاطر يفكر ويفهم

اديني عايش

واديني اتعلمت اغلط حتى فى حق نفسي

سلام يا جماعة

وانتظروا الجديد مع

عالم سمسم

بعد طول انتظار

بعد غياب طويل عن البلوج والحمد لله ادينى رجعت وكمان رجعت فى وقت جميل جدا

وهوه شهر رمضان الجميل وطبعا رمضان مش فوانيس وبس لا ده صيام وصلاة تراويح وقراءة قران

وان شاء الله نطلع من رمضان كويسيين جدا واول يوم العيد ترجع ريما لعادتها القديمة

التهجيس شغال الله ينور

نفوت فرض وبعدين فرضين والمصاحف ترجع فى الدولايب واللبس اياه يظهر تانى والعبايات تختفى

وشوية ماكيب مش حيخصروه والحوارات دى

بس انا نفسى رمضان ده يجى ويخلص وتبقى السنة كلها رمضان يارب

وان شاء الله ربنا يتقبل مننا كلنا

وعلى فكرة انا فى حاجة مزعلانى جدا اصلى ماحدش جابلى فانوس ماما قالتلى هجبلك وطنشتنى ادعولى بقى يجيلى فانوس واختم القران وربنا يحللى المشاكل اللى عندى ويثبتنى على الطريق الصح بعد رمضان ويرزقنى الزوج الصالح وادخل الجنة من دون عذاب يارب كلنا ندخل الجنة دون سبقة عذاب يارب اعتقنا من النار فى رمضان يارب يمر علينا رمضان ده ويكون ربنا اعتقنا من النار وتقبل الله منا ومنكم رمضان وجميع صالح اعمالكم

ومش عايزة اطول عليكوا اكتر من كده سمسمة

اللهم ارضى عنا وراضنا

سلام عليكم
ازيك يا سمسم وازيك يا سمسمه ـ يارب تجيلنا بالسلاامه وتخفى ـ لانك بجد وحشتيينا قوى . وازااى كل الزوار الحلوين . يارب تكونو بخير كلكو

عاملين ايه فى رمضان !!؟ راضيين عن نفسكو ؟
ماهو ده سؤال حلقتنا النهارده واحنا فى الايام الجميله دى وكل واحد بيحاول يقرب من ربنا اكتر . ويدعى ان ربنا يهديه ويثبته على الحق فى الدنيا الصعبه دى ـ ربنا يتقبل منا جميعا ان شاء الله ـ
عارفين ايه اهم حاجه عشان تحس انك مرتاح بجد وسعيد وراضى عن حياتك ؟!؟
مش انك تكون مع الناس اللى بتحبها وتحبك ..لأ
ولا انك يكون معاك فلوس كتير ورصيدك مليان ...برضه لأ
ولا انك تتجمع ويا اصحابك وتقضو يومكو كله دحك وفرفشه وتكونو مبسوطين ...تؤ تؤؤ

بجد بجد الحاجه الوحيده اللى تحسسك بالسعاده الحقيقيه وراحة البال والضمير .. هى لما تحس انك بترضى ربنا ... ساعتها بس هتلاقى الدنيا كلها مفتوحالك والناس كلهم بيدحكو فى وشك وتحس براحه جمييله قوى من جوااك . حتى لو محدش معاك ومهما كانت الظروف اللى انت فيها ..... كفايه بجد انك ترضى ربنا . وتحس انه راضى عنك

اقولكو على سر ..!! انا بقالى كتير قوى بحاول اشترى رضا ربى عنى ... وببيع حاجات كتير قوى فى الدنيا ومش ندمانه عليها عشان ربنا يبقى راضى عنى .. جايز اكون غلطانه فى حاجات بس انا نيتى والله انى ارضى ربنا

بجد يا جماعه بدعيلكو وادعيلى من قلبى ... ربنا يرضا عننا جميعا يااارب

واسيبكو بقى عشان كل واحد يفكر ياترى عمل ايه فى حياته عشان يرضى ربنا ...؟!!!!!؟

15/9/1986

كل سنه وانت طيب يا سمسم ... وعقباااال مييييييييييية سنه

يااارب يحققلك كل اللى تتمناه يا جمييل . وتبقى بداية سنه جميله وسعيده عليك ياارب

انت بجد تستاهل كل خير وكفايه طيبة قلبك واحساسك الجميل يا سمسم .. وربنا يخلينا لبعض دايمـــا

ً

(سمسم جى جى سمسمه)

ــــ ــــ ــــ ــــ ــــ ــــ ــــ ــــ ــــ ــــ ــــ ــــ ــــ ــــ

Happy Birth day to you

"""

Happy Birth day to you

"""

Happy Birth day to you Semsem

Happy Birth day to youuuuuuu

ــــ ــــ ــــ ــــ ــــ ــــ ــــ ــــ ــــ ــــ ــــ ــــ ــــ ــــ

الله أكرم

كل سنة وانتم طيبين زوار بلوجنا المتواضع

كل سنة وانتي طيبة يا جيجي

وكل سنة وانتي طيبة يا سمسمة

وكل سنة وانت طيب يا سمسم

ولا انا مليش نفس يعني

الحمد لله اننا عشنا لليوم اللي نشوف فيه شهر رمضان جديد

والله اعلم ان كنا هندرك شهر رمضان السنة الجاية ولا لا

علشان كده لازم نستغل الفرصة فى الشهر ده

ونحقق كل اللي بنحلم بيه

لاننا مش ضامنين عمرنا علشان رمضان تاني جاي

نشوف احنا محتاجين ايه من ربنا ونحاول نقربله علشان يتقبل مننا ويحققلنا كل حاجة نفسنا فيها بالدعاء

انا عن نفسي محتاج شوية حاجات كده مش صغيرة فعلشان كده انا ناوي اجند نفسي واسلح نفسي بسلاح القرآن الشهر ده علشان هو احسن سلاح علشان تبعد بيه عن الشيطان وتقرب بيه لربنا

شوفوا مثلا انا عاوز ايه

دي المتطلبات بتاعتي

ربنا يرزقني ويسهلي امري فى انه يكتبلي الانسانة اللي انا عاوزها زوجة ليه دنيا واخرة

يغفر ليه ما تقدم من ذنبي وما تأخر كمان

يرضى عليه ويهديني ويجعلني عبد صالح ويهديني للطريق المستقيم

عايز قصر فى الجنة ولو امكن كام قصر كمان جنبهم اصل انا طماع فى حكاية القصور دي

عايز ادرك ليلة القدر واكون ساعتها فى اوج ساعات قربي من ربنا

عايز اطلع من رمضان نضيف كما ولدتني امي مفيش ولا سيئة

عاوز ربنا يتقبل توبتي فى الشهر الكريم ويجعلها توبة صادقة

عاوز اختم القرآن مش هقول كام مرة بس عاوز اختمه وربنا يجازيني على كل حرف بقراه فى كل ايه فى كل سورة فى كل ختمة

عاوز بجد بجد فى حاجة بالي لو ربنا مش كاتب ليه انه يسهلها يبقى يرزقني حسنة خاتمة فى الشهر الكريم ده

عاوز لو مأدركتش بردو شهر رمضان الجاي يكون ده اجمل شهر رمضان فى حياتي قضيته قبل ما ربنا يرزقني حسن الخاتمة

.........................

شوفوا انا طلباتي كتير ازاي علشان كده لازم اقرب اوي واتسلح اوي لان معدش لعب

انا هبقى اكتب بعد كده شوية نصايح علشان ازاي نقرب بحاجات صغيرة بس كبيرة عند ربنا

............................

وربنا يجازيكي خير على شوية الادعية دول يا جيجي ويتقبل منا ومنك يارب

ومش ناسينك فى الدعاء طبعا

...............................

وكل سنة وانتم طيبين يا اخواتي

رمضان كريم

سلام عليكم
كل سنه وانتو طيبيييين .. ورمضان كرييييم
واحشنيييي جداااااااا جداااا يا سمسم وسمسمه
... انا مبسوووطه جدااا ان رمضان دخل خلاااص .. ونفسى اعمل حاجااات كتيير قوى . ان شااء الله هقرى القرآن واصلى التراويح واقيم الليل كماان . ان شاااء الله ربنا يقدرنى واعمل كل ده .. واكيد هدعييلكو داايما ... وانتو كماان لازم تدعولى وتفتكروونى .. وربنا يتقبل منا ومنك داايما يااارب
ودى بقى شويه ادعيه خفيفه تقوولوها كل يوم فى رمضان كتير .. يعنى خليها على لسانكو دااايما وان شاء الله ربنا يتقبل

سبحان الله وبحمده سبحان الله العظيم
ربنا آتنا فى الدنيا حسنة وفى الآخرة حسنه وقنا عذاب النار
اللهم استغلنا ولا تستبدلنا
اللهم إرضا عنا وراضنا
اللهم اجعل السنتنا عامره بذكرك وقلوبنا بخشيتك وأسرارنا بطاعتك إنك على كل شئ قدير

وكل سنه وانتو طيبييييييييييييييين

ــــــــــــــــــــــــــــــــــــــــــــــــــــــــــــ
فين موضوووعك يا سمسمم.؟!!!!!!!!!!؟؟

المره الجايـه متجيش غير ومعاك ولى أمرك .... مفهــــــوم

ــــــــــــــــــــــــــــــــــــــــــــــــــــــــــــــــــ

Iam not angel.....!!!

I'm no angel, but does that mean that I won't fly
I'm no angel, but does that mean that I can't cry
I'm no angel, but does that mean that I won't love
I'm no angel, but does that mean that I can't live my life

I want to find my self
I want to see the world alone again
To take a chance on life again
I want to go
I want to leave

Just to be with you is having the best day of my lifeI want to thank you for giving me the best day of my life

''Some words from dido's albom with some changes ..........

enjoy your time''

شوق مبينتهيش

بانغام موسيقى اغنية عمرو دياب بعد الليالي

وعلى النور الخافت فى ارجاء المكان

وبزهرة جميلة بلونها الروز

وبكلمتي المعهودة

I Love You

ابتدى مشواري فى كتابة موضوع جديد من موضوعاتي
الشوق للحبيب
موضوع ممكن نكتب عنه يجي بتاع 120 بوست فى المتوسط كده وكلهم بيدوروا فى نقط مختلفة عن الشوق للحبيب
هتلاقي اللي يقولك اه منها ومن عذابها
وهتلاقي اللي يقولك مفيش احلى منها
وهتلاقي اللي يقولك الموضوع ده حسب
علشان كده قررت استضيف فى موضوعي النهاردة احد المحبين والمشاركين معايا فى موضوعي النهاردة
اقدملكم صديقي مشنكاح
كتير مننا ميعرفش ان مشنكاح ده حبيب كبير
وعاش فى الحب سنين وسنين
نقول قرب يقفل النص دستة سنين حب وهيام دلوقتي
ونسيب مشنكاح يعرفنا بنفسه اكتر معانا فى البرنامج
اهلا وسهلا يا مشنكاح
اهلا وسهلا يا استاذ حسام منورنا والله
النور نورك يا حبيبي اتفضل قول اللي عندك بخصوص موضوعنا النهاردة
ايه رأيك فى الشوق للحبيب يا مشنكاح
والله يا استاذ حسام انا هتكلم عن نفسي انا
انا ذى ما انتوا عارفين بحب بقالي داخل فى الاربع سنين دلوقتي
بحب بجد من كل قلبي وطلعت كل اللي اقدر عليه من حب فى الاربع سنين دول
قولت فيهم زيادة عن مليون كلمة بحبك
وطلع مني احلى خواطر وكلام يتقال فى الحب
بس ده كله ميهمش
قصاد اللي طلع من قلبي لقلبها

بالراحة يا مشنكاح شوية شوية انت كده هتخطف الجمهور بكلامك الجميل ده وهيبدأوا يدوروا عليك انت ويقلبوا البلوج باللي فيه

لا يا حسام باشا وهي العين تعلى عن الحاجب بردو احنا فين وانتوا فين
صحيح انا بحب وبتحب بس بردوا الناس مقامات
ومن فات قديمه تاه وانت خيركوا مغرقنا
الله يخليك يا مشنكاح كمل
شوف يا استاذ حسام
انا عندي الشوق لحبيبتي بيحصل فى مواقف كتير بمر بيها فى حياتي
بشتاق ليها وانا بعيد عنها باي شكل من الاشكال
ان كنت فى شغل ولا فى تمرين وهي على بالي ببقى مشتاق ليها ونفسي الاقيها جنبي
نفسي الاقيها فى المكان اللي دايما حلمت بيها تكون فيه

لما باجي علشان اكلمها وانتظرها بالساعات بشتاق والشوق ده بقى حالة خاصة بحس بلهيب قايد فى فى قلبي ولا قادر اطفيه ابدا الا اما هي تخش وتطفيه بكلامها اللي ينزل عليه ذى الميه الباردة

شوقي ليها احيانا بيعذبني لان عقلي بيودي ويجيب ساعتها
يا ترى هي كويسة ولا لا
يا ترى بتفكر فيه ولا لا
وحشتها
ولا مش وحشتها
طب وبعدين هي اتاخرت ليه
طب هي بتعمل ايه دلوقتي
ساعتها بخاف ليجيلي هستريا من كتر تفكيري فيها وابقى نفسي اطمن عليها باي شكل
اول ما بشوفها واحس طيفها معدي عليه كل ده بيروح وبيجي مكانه مشاعر تانية خلاص
راحة
حب
اقول ايه ولا ايه بس بجد ببقى فى حالة جميلة اوي بتمنى مطلعش منها ابدا
لانها ساعتها بتبقى عرفت وحست اد ايه انا قلقت فى بعدها
واد ايه اشتقت ليها
وده بيخليها تطلع كل اللي عندها فى كل كلمة بتقولها ليه
ومش بتبخل عليه ساعتها باي مشاعر فى قلبها من ناحيتي
ياااااااااااااااااااااااااه
اد كده يا مشنكاح بتحب
انا سمعت كتير وقليل بس ذى كلامك ملقتش مثيل
الا صحيح على رأي المثل
ياما تحت السواهى دواهي
واللي نحسبه موسى يطلع فرعون
بس اي فرعون ده انت طلعت فرعون عاشق ولهان
هنيجي ايه احنا فيك
وبكده وقت برنامجنا ينتهى
وكلامنا مع مشنكاح مينشبعش منه بس خلاص وقت البرنامج خلص
نلتقى فى الحلقة القادمة
مع موضوع جديد من مواضيعنا الشيقة
اراكم على خير
واحلام سعيدة ليكم كلكم
سلام

زهور الامل

زهور الامل بفتح بيها موضوعي

واشوف فيها امل لبكرة وامل للي جاي بعده

زهور الامل اللي معاها فضلت عايش لغاية اللحظة دي وكأنها غصن شجرة بيتعلق بيها غرقان

زهور الامل اللي حبيتها دونا عن كل حاجة فى الدنيا لاني معاها شوفت الحنان وكأنها حضن ام ماسك بين ايديه طفل صغير محتاج للحنان

زهور الامل هي كمان اللي خلتني يبقى عندي قلب طيب قلب حنين قلب كله حب وهيام

حياتي زهره روحي زهره حبي زهره

زهره امل

زهره فرح

زهره عاشق ولهان

ملقتش فى حياتي معنى من غير زهره احبها وتحبني

ملقتش لحياتي معنى من غير زهره تخليني احب الحياة

بـحـبـهــــــــــا

بحب حنانها فى عز ما انا محتاج للحنان

بحب احساسها وقت ما ابقى محتاج لحد يحسني

بحب قوتها وقت ما ابقى ضعيف وتخليني اقوى واقوى

حبيت فيها الكتير والكتير

واجمل ما حبيت فيها قلبها

قلبها صافي نضيف ذى قلبي تمام

مفيهوش غير حب وحنان

وماضي كله احزان

قبل ما اعرف الامل فى زهرتي

كان اليأس هو عنوان لحياتي

كان الامل شئ مفقود فى حياتي

كان مكان الفرح حزن اكيد وكبير

مكنش عندي امل كبير اني افرح ذى ما انا فرحان دلوقتي بحبها

هي دي زهور الامل

اللي خلتني احبها اكتر من نفسي

بحبك بحبك بحبك

انا والفرح واحزاني

ازيكم يا جماعة

بدمعة جارية نازلة على خدودي

بقلب تعبان مريض بالحزن

بالقدر والظروف اللي بتحوطني من كل مكان

بالانصياع والخضوع للظروف اللي بتقتل فيه كل يوم احساس بالفرحه

كم تمنيت ان افرح فرحة هنيه

ولكم لجئت لله ان يرحمني ويقربني

قلبي رقيقا

تمنى الفرحة ولم يجدها

فى كل طريق اردت ان اسير فيه لاجد فى نهايته الفرح اجد الظروف تتجسد فى صورة الشبح التى يحول بيني وبين الفرح

متزعليش مني ياللي حبيتك

ومتزعليش مني ياللي حبتيني

ومتزعلوش مني ياللي اتمنيت حبكم وقربكم

متزعلوش اني بفكر اني مليش ملجأ الا دمعه وقلب حزين

متزعلوش اني املي فى الحياة هي خلاصي منها

متزعلوش اني اناجي ربي واتمنى قربه

اتمنى رحمته

بانه يخفف عني اللي انا فيه ويخدني ليه

دنيا اتمنعت فيها الظروف

دنيا اسمها الاخرة

كنت طموح كتير وعندي امل دايما فى بكره

بس اتشالت الغشاوة اللي حاططها بايدي على عينيه

اينما ذهبت وجدت حزني يلاحقني

اينما وجدت الفرح كان مخبأ وراءه الحزن الاكيد

اضحك وابكي من جوايا

ولا ابكي من جوا وبره

انا عاوز اعتكف الشهر كامل مش بس العشر ايام علشان ارتاح من البنى ادمين والظروف اللي بتلاحقني

حبيتك يا قلبي فى حبك حبيت الدنيا كلها

حياة حلوة حياة مشرقة

فى حبك يا قلبي عرفت معنى الحياة

حبيتك يا قلبي انا والعذاب وهواك عايشين لبعضينا

اخرتها ايه وياك يا قلبي

اخرتها ايه وياك ياللي انت ناسينا

طول عمري الهوا صونته ولا عمري خونته

ده حبي غنيته وفى قلبي خبيته

واخرة عمري معاك والوقت بيفوت بينا

صابر وبستناك والصبر مش لينا

عيني على عيونك والرمش فى جفونك

قادرة تصدمني عينك بتتكلم والرمش بيسلم وانت مخاصمني

فى كل نظرة شايف غرامك ولا عرفت مره سبب خصامك

واخرة عمري معاك والوقت بيفوت بينا صابر وبستناك والصبر مش لينا

اخرتها ايه وياك ياللي انت ناسينا

يوم على الطريق

مساء الخير مشاهدينا الاعزاء

ودلوقتي جه ميعادنا مع حلقة جديدة من برنامج كتابات ليلية

والنهاردة معانا فى البرنامج صاحب الخاطرة اللي هناقشها النهاردة الاستاذ حسام البهنساوي

ايه الدخلات اللي انا بدخل بيها دي

معرفش ايه السر فى اني بدخل كل مرة بشكل غير التاني كده بس اهو تغيير وعلشان كمان مخليش كله نكد نكد بفرح نفسي بالكلمتين اللي فى الاول دول

الساعة 12:24 بالتوقيت الجديد كان يوم شاق بس جميل مكنش ناقصه الا وجود حبيبتي جنبي مرحتش عن بالي لحظة طول ما انا بمر خلاله بالثواني والدقايق وكمان الساعات

طلعت الصبح فى عربية ملاكي تبع واحد صاحبنا علشان اروح اجيب مرات خالي من المطار وبدات الرحلة على انغام موسيقى البوم تامر حسني ابتدا المشوار

الاغاني شغالة وانا ولا هنا فى دنيا تانية مع واحدة نفسي ومنى عيني اجبها من اخر الدنيا واحطها بين ايديه وفى حضني

واحدة ملكتني وملكت احساسي اخدت كل حاجة فيه حلوة وادتني كلمة بحبك واحساس بحبك وشعور بحبك

بفكر طول الطريق ان ربنا يجمعنا على خير لدرجة اني كنت احيانا اتخنق من الاغاني وابقى عاوز اشغل قران ذى ما كان شغال علشان ربنا يباركلنا ويتقبل مننا دعانا اننا نبقى لبعض وميفرقش ما بينا ابدا

كويس اني باجى واصارح نفسي هنا احسن من اني اكتم فى نفسي

اليومين اللي فاتوا انا متضايق شوية اكمني مش عارف اتلم عليها بس هي بتعوضني بانها كل يوم والتاني تجبلي خبر اجمل من التاني وبتحاول تشيل من عليه الحزن اللي انا فيه بسبب بعدها عني

وانا كمان بصبر نفسي بكل كلمة حلوة هي بتقولها علشان المركب تمشي وترسى ذى ما انا دايما بقول وعاوز على بر الامان

بس بجد معرفش احساس صعب عليه ان حبيبتي معايا ومش معايا مكدبش عليكم لما ببقى قاعد اكلمها وحاسس انها مش مركزة ومشغولة بحاجة تانية ببقى هشيط بس ببرد نفسي باول كلمة بتقولها بعد ما بتقرا كلامي وبقول اني مش متضايق وببقى فعلا خلاص ساعتها مرتاح انها ردت والسلام

بحاول اقنع نفسي ان دايما اي حاجة منها حلوة وبالفعل هي كده لانها رمز للجمال ورمز لكل حاجة حلوة فى حياتي اللي هي باختصار شديد اوي فى كلمة واحدة نفس حياتها

ساعات بوصل اني بقول كلام مش عارف ان كان صح ولا غلط لاني بحس اني تايه وفاقد الوعى وانا بقوله وبحس اني بظلمها كتير بالكلام ده يعني انتي مش مدياني حقي انتي مش مهتمة انا مش لاقيكي انتي وانتي بس بعد ما بروق بندم كتير على الكلام ده وبتمنى انها صدرها يكون رحب ليه ولكلامي علشان تستحمل ذيي والمركب تمشي

بحبها دي كلمة قولتها بقالي سنين

عشقتها ووهبتلها حب محبتوش لملايين

سحرتني وخلتني بعيد عن البنى ادمين

فى حبها اتعلمت ازاي اعيش واقول الحمد لله رب العالمين

تعبت كتير فى بعدها وارتحت اكتر فى لقاها

تعرف ازاي تقولي بتحبني وتعرف ازاي تقتلني بالشوق لهواها

ملكتني فى سحر كلامها وسحرتني بكلامي ادامها

بنسى نفسي والدنيا والناس ولا افتكرش الا ده الاحساس

احساسي بحبها وبوجودي قربها وبهوايا اللي عمره ما قل فى بعدها

زهرة فى بستان ملاك كله حنان

عاشق وولهان اسره سحر الكلام

نقول كفاية صراحه لحد من اللي بيقروا الكلام يقع فى حبي ولا حاجة وانا بصراحة مش عاوز حد غيرها يحبنى

بحبك يا نور عينيه

واسيبكم ونلتقي فى وقت قريب ان شاء الله

ساعة صراحه

مساء الخير عليكم قراء بلوجنا المتواضع

جه ميعادنا دلوقتي فى كتابة بوستنا المعهود

فى تمام الساعة الثانية عشر والنصف

جاي وكل اللي ببالي اني اكتب عن الحب

نتيجة للحالة اللي مسيطرة عليه دلوقتي

مفيش حد من اللي بدأ يقرا الموضوع وشاف كلمة "الحب" إلا وجه بباله اني بتكلم عن الحب اياه حب الحبيب والحبيبة يعني

عندكم حق انا نفسي بقى هو ده الحب الغالب والحالة الغالبة عليه فى الايام اللي فاتت

حبي للإنسانة اللي دخلت قلبي وملكته بكل ما هو فيه من حب ومشاعر وطيبة وحنان

اخدت ويا شوية الحاجات الجميلة دي اللي إحساس انسان بالاحتياج للحب والحنان

إحساس انسان بالضعف والهوان ادام كلمة بحبك

احساس انسان بفقدان كتير حاجات كان نفسه فيها ولا طلهاش

جوايا كتير حاجة ذى ما اخدت الحلو اخدت الوحش

ساعات بشفق عليها وبتصعب عليه اني بشيله فوق طاقتي

على الرغم اني عمري ما طلعت همي فى كلامي وياها وكنت احتفظ بالوحش لنفسي واطلع الحلو ليها

فين وفين لما كنت اجي واقولها انا تعبان محتاج لحنان

كنت مفكر ان النسيان ده احسن دوا علشان الحياة تفضل على بر الامان

اصلي حبيتها يا جماعة

بعدنا عن الموضوع اللي جاي اتكلم فيه النهاردة مبعدناش كتير بس فى حاجات تانية نفسي اقولها اكتر من اللي انا بقوله دلوقتي

شوية قرآن من القرآت النادرة اللي شبه بتاعت المياتم ودار المناسبات دي وانا بكلم حبيبتي حاسس بقمة الهدوء فى الكلام صحيح هي مش معايا وجايز متكلمناش ربع ساعة فى الساعة ولا الساعتين اللي هي قعدتهم

صحيح مسمعتش كلمة بحبك واحدة اتقالت فى كلامها

صحيح كنت محتاجلها اكتر جنبي ومش لاقيتها

بس كنت ارد واقولها اما تحس اني مش مبسوط اقولها انا مبسوط انك مبسوطة ويا اللي بتكلميهم اصحابك اكيد محتاجين ليكي ومحتاجة ليهم انا وياكي مش هطير انتي دايما جنبي ويكفيني اني بكلمك بينك وبين نفسي وببص لصورتك اللي مش بشيلها من ادامي

بالفعل انا فرحتي من فرحتها وراحتي من راحتها بس قلبي ده محتاج كتير

مفيش كتير يعرفوا الظروف اللي انا بمر بيها يجوز جيجي هي الوحيدة اللي خليتها تعلم بكل حاجة بمر بيها اصلي استحالة استحمل كل الحاجات دي لوحدي

بفكر اخلي فى قلبي حب ربنا شوية اكتر من كده بفكر الجأله بطرق اكتر من اللي انا بلجأ بيها دلوقتي اللي جاي فى حياتي صعب وحاسس انه مش هيعدي بالساهل بس بحاول ابسط نفسي بشوية الحاجات الجميلة اللي فى حياتي

(حبيبتي) انا فتحت القوس ناوي اكتب اكتر من حبيبتي ناوي اكتب الحاجات الجميلة اللي فى حياتي يعني بس للأسف مش لاقي حاجات مؤثرة ينفع تتلخص فى كلمة تنكتب ما بين القوسين بس كفاية الحمد لله ايه الطمع اللي انا فيه ده اما اني انسان طماع صحيح

هو ده اللي بقوله لنفسي بالفعل علشان اعيش واكمل

اني طماع واللي انا بطلبه ده مش حقي

جايز احيانا بقول لنفسي الفرح مش حقي

جايز احيانا بقول كلمة بحبك مش حقي

جايز احيانا بقول اني يبقى ليه ضهر يسندني وقت ما اجي اقع ويوقفني على رجلي بردو مش حقي

اكتب اقول ايه

هو انتوا ناقصين نكد

قال وجاي اتكلم عن الحب قال

لا كفاية كده اوي

سلام يا جماعة واجي اكمل لما ابقى رايق شوية

صحيح ابقوا شوفوا الصورة والكلام انا اللي عاملها

سلام

قرار 6865585754855479258

بسم الله الرحمن الرحيم

السلام عليكم ورحمة الله وبركاته

نبدأ الجلسة

أيها الشعب شعبي العريق العريض

بعد التعرض للضربة الجوية المضادة من المدعوة جيجي شكانوف فى تمام الساعة 18 بتوقيت ام ابراهيم خرشوف قررت انا رئيس مجلس الثورة القيام بالرد عليها بهذا الصاروخ الارض جو واسقاط طائرتها فى منطقة ب من على ارتفاع سفنتر كيلو جرام ونص فوق البلوج

وأسر كل من الطيار خربتشوف شكانوف ابن عم المدعوة

مساعد طيار خرشوف بالمكسروش ابن اخت المدعوة

ومقتل كل عدد من الجنود ضاعت هويتهم أثر حريق الطائرة

وردا منا نحن رئيس مجلس الثورة على تلك الضربة الجوية فى البلوج

قررت كتابة الموضوع الاتى

انه فى تمام الساعة السابعة والنصف صباح يوم الجمعة بعد مشاهدة فيلم كده رضا وموتي من الضحك

قررت كتابة هذا البوست

لاعبر به عن مواساتي لشعب البلوج والبلوجات المجاورة أثر الضربة الجوية التى قامت بها العميلة جيجي شكانوف

وما زالت غائبة عن ارض المعركة اختها المتملصة والهاربة الفارة سمسمة خروب

هذا كله نتيجة للتفرقة العنصرية بين اراضي الصعيد الاسواني السوداني

والاراضي الاسكندرانية الشاطبية السيدي بشرية

والاراضي المعفنة المنيلة بنيلة الكفراوية

هذا وقد قررنا الاتى

إطاعة واحترام قرار المقدمة جيجي بكتابة بلوج يوميا وانتظار تقرير المراقبة منها للنظر فيه والحكم عليه من حيث المضمون والشكل والطعم والرائحة

فهي لها ذوق خاص فى كتابة الكومنتات الفاضحة

ولقد قررت ايضا انا سمسم النجم

كما قدد قررت سابقا

تغيير شكل البلوج ليليق بالشهر الكريم شهر السلام

واعلان هدنة بيني وبين جيوش الاعضاء او الاعداء كلاً على حداً سواء

هذا وبالله التوفيق

الله - الوطن - البلوج

الكابتن اركان لواء سمسم النجم

محكمـــــــــــه

سلام عليكم
ازيكو يا حبايبى يا حلوين
سمسم بيكتب كلام جامد وبيصدرفرمانات كبيره قوى .... ايه رأيكو انتو فى الموضوع ده ؟؟؟
نسيبه اال يكتب كده ونكتفى بالكومنتات ....؟ ها .!!؟
فى الواقع الموقف صعب لان الواد سمسم .أأقصدى الكابتن سمسم كلامه جامد ومحدش هنا أده بصراحه
بصوا انا بصفتى عضوه فى هذا البلوج . ومن منطلق الحقوق الموكله الي . طبقا للماده رقم 01638 صـ 010.والماده رقم 01636 صـ 010 برضه من قانون فودافون الدولى بنظام السماح مدى الحياه والجيل الثالث يعنى اتكلم مالقلب . فلقد اصدرنا حكمنا الآتى : - احم احــم

سيتم وضع المدعو حسام شرفنطح الشهير بـ "سمسم" تحت الملاحظه والمراقبه المستمرة كل يوم . وسيتم تشديد الحراسه على البلوج لمتابعة كل جديد . ولن نكتفى بالمراقبه بل سيتم التواصل ايضا من خلال كل ماهو جديد من مواضيع وافكاررر - كما سيتم محاسبة المدعو سمسم عن اى تقصير والمطالبه بالموضوع كل يووم . وعليه التنفيذ بدون اى اعذار . ولن تأخذنا به اى رأفه او رحمة فى حالة تملصه او تقصيره فى الكتابه .وبدأً من اليوم الخميس الموافق 6/9/2007 وفى تمام الساعه الحادية عشر مساءاً قد أصدرنا حكمنا السابق وتم وضع المدعو سمسم تحت الملاحظه ........ والله الموفق

اعاننا الله على حماية هذا البلوج وإعماره
الله – الوطن – البلوج ههههههههههههههه .. ربنا يشفيييك يا سمسم

رمضان كريم

السلام عليكم ورحمة الله وبركاته

سيداتي سادتي المشاهدين

والاخوة المستعمين إلى اذاعتنا على الترددد الاقليمي

من المحيط إلى الخليج 14215.45555

وحشتونا جدا

لقد قمنا بثورة من اجل كتابة هذا البوست

ويرجع الفضل فى ذلك إلى كل من المقدم سمسمة عبد الغفار الشاطبي واللواء جيجي عبد التواب الصعيدي

يتضمن البيان التالي العديد من القرارات التعسفية المتخذة تجاه الشعوب التى تجهض حركة السلام فى البلوج والبلوجات المجاورة

وقدد قررنا نحن مجلس الثورة بقيادتي انا سمسم عبد العظيم البحراوي ان اقوم بكتابة بوست يوميها على مسئوليتي الخاصة مساهمة مني فى صد حركات اجهاض الكتابة فى ذلك البلوج وكتنشيطاً أيضا مني لحركة الكتابة وجعلها شئ لا يستهان به فى تلك الاونة من الزمن

ابنائي وبناتي المواطنين

نحن الان على ابواب الشهر الكريم المبارك

شهر رمضان الكريم

ولذلك لابد من القيام بعمل بعض التغييرات فى شكل البلوج سواء من ناحية المضمون او الشكل العام

وسأشرف على ذلك بنفسي نظرا لتغيب اعضاء مجلس الثورة

لن نضعف امام قلة الكومنتات

ولن يقف مجهودي على الكتابة فقط

بل سيتجه إلى النصح والارشاد فى الكثير من الامور

---انا بدأت احس اني عضو فى مجلس الشعب---

لا يا عم كفاية كده اتكلم عادي ليطخونا النار انا والجوز ولايا اللي معايا مهماش ناقصين ضرب دول مضروبين بالنار خلقة

دلوقتي كل اللي عاوز اقوله بجد

كل سنة وانتي طيبة يا احلى سمسمة

وكل سنة وانتي اطيب يا احلى جيجي

وكل سنة وانت طيب يا احلى سمسم ولا انا مليش نفس يعني

ويارب بجد رمضان ده يبقى شهر كريم ومبارك علينا ويستجاب لينا فيه دعواتنا خصوصا دعوتي انا بانه يقرب ليه البعيد وينولني مرادي وميبعدنيش عن اي حد بحبه

انتوا بقى عاوزين تدعولي ادعوا محدش هيمسك لسانكم ولا قلبكم

انما انا عن نفسي سأحتفظ بالدعاوي لنفسي

ويارب نخرج من الشهر الكريم ده مغفور لينا ومدركين ليلة القدر ومستجاب لينا على الاقل كل يوم دعوة واحدة

وخاتمين القرآن بردو على الاقل تلت مرات فى صحابة كانوا بيختموه بالخمسين والستين مره

خلينا احنا اقل من ربعهم ونختم تلت اربع مرات واللي يقدر يختم اكتر ميتأخرش

حاسس ان رمضان السنة دي رمضان مش عادي

انا دايما عندي رمضان -رمضان- غير عادي بس بردو السنة دي ليه طعم جديد

يارب اقدر احقق احلامي وربنا يستجاب ليه فى دعواتي ويدركنا ليلة القدر يا رب وينولني كل اللي فى بالي

وانتوا كمان يا اخواتي

اسيبكم مع الموضوع الرخم ده

تعلقوا متعلقوش هكتب كل يوم يعني هكتب

ودلوقتي اقولكم

سلام واراكم يا بالليل يا بكره ان شاء الله

سلام يا اخواتي