انا والفرح وحياتي

ورجعت بعد فاصل من المواضيع اللي اكتفيت فيها اني اضع صورة واخلي الكلام عليكم انتوا واعتقد الفكرة عجبتكم وشوفت منكم حاجات مكنتش مستنيها بصراحة لاني مكنتش مفكر ان اي حد هيفهم انا عاوز ايه من ورا كل صورة فى ناس خيبت ظني فيها وفى ناس كنت عارف انها مش هتفهم ولا هتقدر وبالفعل حصل ومدوش اللي عملته حقه

هي الدنيا كده

مش كل الناس هتفهمك ولا كل الناس هتديك حقك

الصعب ان اللي يسرق حقك منك ويجرحك يبقى اقرب الناس ليك

على اد ما يكون قريب منك على اد ما يكون الوجع اكبر واكبر

مش ده اللي جاي اتكلم فيه

جاي اتكلم عني وعن فرحتي وسعادتي اللي دايما كانت بايد غيري مش بايدي

عمري ما عرفت اسرق فرحتي ولا ضحكتي

ذى ما غيري بيسرقها مني علشان يفرح ويضحك

جايز العيب مش فيهم

العيب فيه انا اللي بدي الفرحة من غير حساب

انما هما

الفرحة حسابها كبير اوي ومش اي حد يقدر عليه

زمان قبل ما اعرف طعم الفرحة

كان نفسي ادوقها واعيشها اوي

انما بعد ما دوقتها واتحرمت منها من جديد

وصلت لمرحلة اني اندم اني فرحت

لاني قبل كده مكنتش عارف طعم اللي محروم منه

وبقى الوجع اكبر والالم اكبر من الحرمان

بس وصلت لمرحلة قولت فيها افرح حبة احسن ما مفرحش خالص

اهو علشان يعني اقول اني فرحت على الاقل وقتها

بس اد ايه ده بيتعب البني ادم

انه يبقى انه فرحان وعارف انه كمان شوية صغيرين اوي هيتحرم من الفرحة اللي هو فيها دي

ليه الناس بتحرمني من الفرحة مع العلم انهم مش هيخسروا حاجة الا اما يفرحوني

وليه انا الناس اللي بتفرحني مقربش منها واحبها واخليهم كل حياتي

انا ظالم مش عادل

ذى ما غيري ظلمني

انا ظلمت غيري

سمسم