بعد غياب طويل عن البلوج والحمد لله ادينى رجعت وكمان رجعت فى وقت جميل جدا
وهوه شهر رمضان الجميل وطبعا رمضان مش فوانيس وبس لا ده صيام وصلاة تراويح وقراءة قران
وان شاء الله نطلع من رمضان كويسيين جدا واول يوم العيد ترجع ريما لعادتها القديمة
التهجيس شغال الله ينور
نفوت فرض وبعدين فرضين والمصاحف ترجع فى الدولايب واللبس اياه يظهر تانى والعبايات تختفى
وشوية ماكيب مش حيخصروه والحوارات دى
بس انا نفسى رمضان ده يجى ويخلص وتبقى السنة كلها رمضان يارب
وان شاء الله ربنا يتقبل مننا كلنا
وعلى فكرة انا فى حاجة مزعلانى جدا اصلى ماحدش جابلى فانوس ماما قالتلى هجبلك وطنشتنى ادعولى بقى يجيلى فانوس واختم القران وربنا يحللى المشاكل اللى عندى ويثبتنى على الطريق الصح بعد رمضان ويرزقنى الزوج الصالح وادخل الجنة من دون عذاب يارب كلنا ندخل الجنة دون سبقة عذاب يارب اعتقنا من النار فى رمضان يارب يمر علينا رمضان ده ويكون ربنا اعتقنا من النار وتقبل الله منا ومنكم رمضان وجميع صالح اعمالكم
ومش عايزة اطول عليكوا اكتر من كده سمسمة
7 comments:
مش عارف ارد اقول ايه ولا ايه
بجد مبسوط اوي اني شايف البوست ده
كلامك جميل كالعادة يا سمسمة
ويارب ما يحصل حاجة من اللي قولتيهم فى الاول دول
ويتقبل منك كل الدعاوي الجميلة دي
ليكي ولينا انا وجيجي وكل المسلمين
ربنا يخليكي لينا يا سمسمة يارب
وليكي فى رقبتي فانوس
سلام يا ستي
مرسى يا سمسم وبعدين انا هعمل بالفانوس ايه وانت معلقه فى رقابتك انا عايزاه العب بيه على العموم مرسى يا جميل
وسلملى على ندى لو كلمتها اوك
ههههههههههههه . معلش بقى انا دااخله علييكو بادحك على موضوع الفانوس اللى فى رقبة سمسم.. ههههههههه يااازكيه يا سمسمسه هو يعنى هيعلقهوولك فى رقبته !!!!!!!
ماااعلييينا خلينا فى الكلااام الجمييل والمفاجأه الاجمل وسمسمه حبيييبتى اللى رجعت بعد طووول انتظاار . وبجد بجد مبسوووطه قوى انى بشووفها فى موضوع جديد هنا مش بس كومنت .... يا الف حمدلله عل سلااامتك يا سمسمتنا وربنا يخلينا مع بعض دايما انشاء الله
وبعدين يا ستى ان شاء الله ريما مترجعش لعادتها القديمه لكن ترجع ريما جديده اجمل واهدى واحسن كتير فى كل حاجه . ويكون رمضان ده غير فينا حاجات كتير للأحسن ان شاء الله
بس انتى جيتى عالجرح يا سمسمه . عشان انا كماان مش عندى فانوس ... اهىء اهىء
وربنا ياارب يتقبل منك الدعوات الجميله دى ان شاء الله
اللهم امين يا سمسمه ويارب يحل مشاكلك ومشاكل بقيت البشر الى عندى وعندك ويارب يرزقك بالزوج الصالح وانا كمان وكمان جيجي وكل الف رمضان وانتى باحسن حال سلامى لجيجي
ندى
والف سلامه عليكى يا احلى قمر على شاطىء اسكندريه بجد انا اسفه والله ما كنت اعرف انك تعبانه يارب تقومى لينا بالف سلامه
ندى
هاي سمسمه انا حبيت اقول كومنت علي كلامك الجميل ده لو تسمحيلي يعني كلنا بنشوف اللي انتي قولتيه ده في الشارع وفي الجامعه وفي التي في كمان وللاسف ان ده اللي بيحصل في رمضان ليه ماحدش يعرف فجاه اول يوم لرمضان تلاقي صاحبتك اللي مش محجبه لابسه حجاب واللي ما بتصليش تلاقيها بتقولك ياللا نروح نصلي التراويح وهي اصلا ماتعرفش التراويح كام ركعه واللي بتحط ميكب كامل جايه حاطه جزء منه تقوليلها ماهه ده كمان حرام تقولك لا انا مش حاطه روج يبقي انا مش فاطره وده مش حرام وكل واحده ماسكه مصحف بتقرا وتقولك اصلي عاوزه اختم القران واول مارمضان يخلص يبدا كل شئ يرجع لاصله والحجاب يتحط في الدولاب والمصحف يتحط في المكتب او حتي تحت المخده واللبس التحفه اللي بيتلبس يظهر تاني والميكب الكامل يتحط تاني انا نفسي اعرف هما عاوزين يضحكو علي مين بالظبط هل علي الناس والا علي نفسهم والا متخيلين انهم ممكن ولو لواحد في الميه يضحكوا علي ربنا اللي شايفهم في رمضان وقبله وبعده وعارف نيتهم عالعموم مافيش في ايدينا غير اننا ندعيلهم ربنا يهديهم ويهدينا سوري ان كنت طولت بس فعلا الموضوع يستاهل المناقشه لانه موضوع مستفذ للغايه وكل سنه وانتم طيبين وربنا يتقبل منا اجمعين باي باي وعلي فكره بمناسبه فانوس رمضان انا عندي فانوس من اولي اعدادي لحد دلوقتي محتفظه بيه ممكن تاخديه لو عاوزه هو جميل جدا بس فيه مشكله واحده انه عاوز فانوس لو تقدري تجيبي للفانوس بتاعي فانوس ممكن تاخديه بس تبقي ترجعيه بعد رمضان هه مش تاخديه علي طول لان ده تحفه اثريه وكل سنه وانتي طيبه باي باي
مرسى على ردك يا شوشو والحمد لله حد جديد عبرنا ورد علينا وربنا يخليكى على زوقك وان شاء الله ربنا يهدينا كلنا والمناظر اياها دى تختفى بقى وبالنسبة للفانوس انا بقول اشترى واحد اسهل يعنى مثلا اخد بتاعك واصلحه والمعه وفى الاخر تخديه ده يبقى ظلم
Post a Comment