بعد الغيبة

بعد الغيبة الطويلة اوى دى قلت اقرا المواضيع اللى فاتت اهوه اعرف اللى فاتنى واتصدمت

اه اتصدمت لاقيت ناس كتير اوى وحاجات كتير فايتانى

اولا عايزة اشكر كل الناس اللى دخلت على البلوج ويارب يكون عجبها وبجد مرسى ل الاميرة وقمر السما ونانسى يويو وهمسة وملاك الليل الحزين ودمعة حب والرايقة وكل الناس اللى كانوا جنب سمسم وانا مش موجودة

وعايزة اقول للناس اللى كانت بتسال سمسمة مين وعايزة تعرفنى خلاص انا رجعت وان شاء الله هتعرفونى اكتر

اما بالنسبة لسمسم فانا كنت متوقعة اشوف كم النكد ده كله تخيل يا سمسم لما لاقيتك كاتب موضوع العيد ده وفرحان اوى كده استغربت وقلت اكيد انت كنت تعبان

ازاى سمسم ملك الكابة والنكد يتنازل ويفرح فكها بقى يا ابو ميمى والبت جيجى بت اللذينا وحشانى اوى بس انا زعلانة منها ومش هعبرها بس كده وكده يعنى اكيد هكلمها وسلام بقى ده انتوا راغيين اوى ومفصلتوش لـُك لـُك لـُك لـُك لـُك أيــــــــــه

سمسمة

scare to death

اهلااااااااااااااااااااااا بيا بعد طول الغيبة

الترحيب ده طبعا لانى متاكده ان ماحدش هيرحب بيا بعد الغيبة الطويلة دى

وتلاقيكوا بتدعوا عليا او يمكن تكونوا ارتحتوا منى

بس بجد والله كان غصب عنى عشان كده انا خايفة مووت زى ماقلت فى العنوان لتكونوا نسيتونى

انا سمسمة ام ميمى ولا ايه يا ابو ميمى

المهم يارب يكون الكل بخير وتكونوا مبسوطين وادعولى بقى انجح زى الواد سمسم كده ياربعلى العموم مش هطول عليكوا فى اول رجوع ليا وسلاااااااااام كبير قوى لقمر السما ولكل صحابنا الجداد اللى بيشوفوا البلوج بتاعنا اوك سلاااااااااااام

سمسم

المرة دي غير كل مرة كتبت فيها
المرة دي مرة هتفصل بيني وبين ايام وحاجات كتيرة وهتضع حد لعذابي اللي فات
المرة دي هتفصل بيني وبين ايام وحاجات كتير وهتضع حد لبداية عذاب الجاي
جاي اكتب وقاصد اني اتكلم عني مش عن غيري
فات وقت كتير وانا متكملتش عن نفسي بصدق وعن اللي بعانيه فى الدنيا
دايما راسم لنفسي صورة الغلبان الضحية المدبوح الجريح فى الزمن القاتل الغدار القاسي
بس يا ترى منين جات الصورة دي يا ترى ليه خيال بالشكل ده اني اقدر ارسم كل ده من الخيال
معتقدش
كل اللي فات كان تجسيد لحياتي اللي على رأي المثل "حبة فوق وحبة تحت"هي دي حياتي
حبة فوق السما طاير بجناحات من الفرحة والسعادة اللي لا يمكن هيوصل ليها حد غيري لان دي سعادة مكتوبة باسمي ومهداه ليه من شخص وشخص ليه انا هخبي عليكم يعني مهداه ليه من حبيبتي اللي ياما كتبت عنها كتير وكتير
وحبة تحت سابع أرض منداس جريح مقتول عنواني حزني وصاحبي دمعي وحياتي عذابي ولا يمكن حد يدوق العذاب والحزن اللي انا فيه لان ده كمان حزن مكتوب باسمي انا مهدى ليه من الدنيا ومن الظروف ومن اللي بيخليني ابان فى عيون غيري وحش كاسر جارح
واللي بيجسدني احيانا فى عيونهم على على اني كداب وخاين ومنافق ومعنديش غير الكلام اخبي وراه نفسي
تعبت من التفكير فى حكاية ان حبيبتي هي سبب الذل والهوان اللي فيه
لاني كل اما افتكر ضحكة ضحكتها الاقيها كانت سبب فيها
الفرق اني حاسس اني مجروح ومقتول لانها مش فاكرة اني انا كمان فى يوم من الايام كنت سبب ضحكة ووقت الزعل والبعد ببان الوحش الكاسر اللي ملوش ذي
مش جاي اشكي همي ولا اطلب المساعدة من حد ولا افرجك عليه يا حبيبتي واوريكي نتيجة بعدك عليه ايه
انا مش هبقى مثال للدنيا علشان يتمهزقوا عليه ويقولوا المجنون اللي ضيع حياته علشان حبيبته اهوه
بس هكون مثال للدنيا علشان يقولوا الانسان اللي عاش لحبيبته لاخر لحظة فى حياته اهوه
مهما كانت العواقب مهما جرحتي مهما بعدتي مهما قسيتي مهما قويتي انا مهما كنت ضعيف هكون قوي ادام بعدك واصبر واحلم بيكي
انتي مش مجرد حلم حلمته قومت من النوم لاقيته حقيقه انتي حياة وذكريات وماضي وحاضر ومستقبل
كلام ياما سمعتيه بس كان لازم تعرفي انه مش كلام ده ذى ما هو كلام ده واقع واحساس
مجاش ببالك وانتي ويايا فى لحظة سعيدة قضتيها معايا انك تبادلي الضحكة اللي برسمها على شفايفك بدمعة تنزل من عيني متلاقيش اللي يمسحها
عشتي فى وهم اني انك اللي مخلياني اعيش وانا اللي بقتل فيكي والحقيقة اني انا ميت فى سبيل حبك
مش قادر اتكلم مش قادر اوصف ايه حالي مش ههدد مش هبكي مش هجرح بس هدفن
هدفن نفسي بالحيا يوم ما افكر اعيش يوم من غيرك
رسالة ببعتها لكل الدنيا من هنا بالبلوج
انا مش قليل
ولا عمري كنت قليل
ولا عمر البكى والتسامح من الراجل ويا حبيبته كانوا ضعف ولا قلة تحكم
بهديها لكل بنت عايزة تعيش حياة سعيدة متدفنش نفسها بنفسها ان لاقيتي انسان بيحبك امسكي فيه بايدك وسنانك واسف على تعبيري بس قليل انكم تلاقوا فى الزمن ده حد بيحب بجد
اوعوا تقولوا بكى وضعف وذل ذى ما غيركم بيقول لا فوقوا لنفسكم هوا ده الحب ان الحبيب يقدر حبيبته ويذرف ليه من الدمع ايام وايام لمجرد لحظة تبعدها عنه
واللي فاهم غير كده يبقى عمره ما هيعرف معنى الحب وهيعيش فى وهم اسمه اتعود على حياة عايشها مجردة مش قصة حب كاملة ذى ما هو فاهم
رسالة من قلبي لاي بنت ولاي راجل يقرا كلامي
فوقوا لنفسكم قبل فوات الاوان وقبل ما تكونوا سبب فى موت قلوب حبتكم
ان كنت ببان قدامكم اني قوي واني اقدر استحمل غيري مش هيستحمل ان كنت للنهاردة عايش على حبها غيري هيجري هيهرب اوعوا تسبوه يهرب حبوا اللي يحبكم ومش تخلوه يبعد عنكم
أرجع للي جاي اتكلم فيه

.........
وداعـــــــــــــــــــى

........................................
محدش فكر من ورا كل الكلام ده كله ان ممكن كلمة ذى دي تيجي
وداعك وداعك انت ليه انت مش بتقول قوي وهتستحمل وهتكمل وهتحب لاخر يوم فى عمرك ايه اللي جاب سيرة الوداع بقى
انا على كلامي ومخلفتوش ولا عمري هخلفه لان دي حياتي
دلوقتي حياتي مبقتش بس قصة حبي اللي هتفضل لاخر يوم فى عمري عايش فيها واللي هحلم كل يوم قبل ما انام اني اتوجها بالبيت السعيد ويا الانسانة اللي طول عمري بحلم بيها
الوداع المرة دي هيبقى من هنا
من البلوج
جايز يكون اخر بوست بكتبه فى البلوج هنا
مش لان البلوج مش لاقي اهتمام ولا ان البلوج ناسيه حتى اصحابه ولا ان البلوج بقى مجرد ملجأ بجري ليه وقت ما ابقى لوحدي
انما لاني اتعرضت للي يمنعني يعن البلوج والنت واصحابي وحتى حبيبتي سمسم فى كارثة الحمد لله بعد طول انتظار
ومش اي كارثة والحمد لله اللي ياما اتمناه اهو جاله لحد عنده
اد ما دموعي موقفتش من ساعة ما بدأت احس ان الهروب ممنوش فايدة ولازم اواجه المصيبة باني استسلم ليها
اد ما انا مش عارف اقول فرحان ولا راضي باللي هيحصلي ده لاني لاول مرة هكون بعيد عن كل حاجة بحبها غصب عني مش هما اللي هيبعدوا عني
رغم ان الكلام مش عنها دلوقتي الا اني بقول بحبها لاني فعلا بحبها مش قادر اخلي صورتها تفارق عيني ولا تبعد عنها هي اللي دايما فى قلبي وادام عينيه بحبها
رغم ان الكلام مش عنهم الا انهم هيوحشوني اخواتي اللي معتبرتهمش اقل من كده
رغم ان الكلام مش عنك الا انك بجد يا جيجي عارفة نفسي اقول ايه دلوقتي لانك ياما عرفتي انا عاوز اقول ايه من غير ما اتكلم
رغم ان الكلام مش عن اي حد فيكم دلوقتي الا اني اسف لكل بنى ادم جرحته او خليته يجي فى يوم بسببي يقول عليه اني انسان مش كويس
رغم ان الكلام عني وعن ظروفي الا اني مش هقدر اتكلم عن نفسي اكتر من كده لان خلاص جه الوقت اللي تمسحوا سمسم بالاستيكة من حياتكم لانه خلاص بالفعل هينسحب من كل حاجة كان هو فيها
الا حبيبته اللي هيفضل عايش ليها لاخر يوم فى عمره
انا واثق ان كل بنى ادم هيقرا الكلام ده هيصدقه
الا انسانة وحيدة هتقول عليه مجرد كلام ومناوشة منه لانه يقربني منه بس حتى لو الكلام مجرد كلام ومجرد مناوشة ذي ما هتفهم او ذى ما انا بحاول اتوقع انها هتفهم فانا فخور اني بناوش وبحارب علشان اقرب حبيبتي مني
مش ابعدها عني
شوفتي انا بقية ايه شوفتي نتيجة كل اللي حصل ايه شوفتي حسام بقى ايه شوفتي حياتي بقت ايه سعادتي بقت ايه شوفتي دموعي بقت ايه شوفت روحي في مين
هو ده انا يا حبيبتي اللي اسكترتي على نفسك وعليه اننا نعيش سوا فى امان من غير بعد ولا هجر
بكتب كلامي ودموعي هتمضي والمي هيشهد وحزني هيبص ويسكت وجرحي هيفضل رفيق لكلامي على مر الزمن
لم تسنح لى الفرصة حبيبتي ان اضمك فى احضاني
لم تسنح لي الفرصة ان انال قسطاً من الحنان
ضاعت الايام هباءً وضاع عمري فى بعد الاحباءِ
لم تسنح لى الفرصة ان اضحك ضحكة قد اتذكرها فى ظل عذابي
ولا سمحت ان ارى من السعادة ما يكفي ان يحيل عني حزن قلبي
لم افعل ما فعله غيري من جرائم وقتل ابر ياء
فقط أحببت وما الحب جريمة فى حق الأسوياء
أحببت أن اكون رجلاً تفتخري به
ذهبتي بعيدا ولعنتي يوماً التقيته فيه
أحببت أن أكون مثلا يحتذى به فى قصة حبي
كنت لكي مثلا للبشاعة والكأبة والحزن الأكيد
هذا هو مصيري سجني الابدي او موتي على يد أحدهم
هذا ما ما اخترت لنفسي بعد فراقك يا فتاتي
لا تتعجبي فدوام الحال من المحال
لا تتعجبي فأنني قد ذوقت كأس المرار دواما وتكراراً
جاء يوماً اشربه واتذوقه بيدي واسعى إليه
فتناول السم عندي ارحم من طعنة سكين فى قلبي الجريح
فهذا القلب قد راى منك حباً لم يره من سواكي
واعطاكي حبا لم يراه غيرك
هذا القلب كان عرشاً لكي وعريناً تحتمي به
هذا الذي نعتيه بما نعتيه لن أجرأ على قولها
فتلك نتائج للكثير من المسببات وكلٌ منا أعلم ما تلك المسببات
فليستقبلني سفير الموت بكل فخر احترام
وليحضني السجان فى احضانه
عسى ان يعوضوني يوماً عن حنان احضانك
لما كتب علي الحزن فى عرين شبابي
ولما السرحان والذهول هو حالي
أبسبب ذلك الزمان القاسي الذي لا يفرق بين عاشق وجاحد
أم بسبب الظروف التى جعلت مني مجرما فى حق حبيبتي
لو كان الزمان فها أنا هنا أنسى زماني
وإن كانت الظروف فها أنا هنأ ألعن ظروفي
لما يا زماني تركتني حزينا
لما جعلت دموعي رفيقي
وداعاً سمسم
لحين إشعار اخــــــر

No Comment

فضفضة

السلام عليكم ورحمة الله وبركاته

جاي هربان من نفسي ومن المناقشة ويا نفسي اللي مبيجيش من وراها غير الهم

جاي اتكلم هنا واطلع وزي ما تيجي تيجي

يتقال هربان

يتقال طفشان

يتقال ذى ما يتقال المهم اني اتكلم

ممكن اتكلم واقول ان الدنيا مش بتديه كل حاجة هو عاوزها

ولو عاوزها ولقاها لازم يتعذب بيه علشان يعرف قيمتها

واول ما الواحد ياخد الحاجة اللي ياما تعب فيها يبدأ يحس بالفتور والملل من الحاجة دي

ومش بس كده بنبدأ نشوف الحاجة دي وحشة بعد ما كانت الحاجة دي بيتمثل فيها الجمال فى حياتنا

ليه الانسان مبيحسش بالحاجة الا اما تضيع منه

وليه اكتر الانسان بيحس بالملل لما يبقى نفسه فى حاجة وبعدين ينولها

ليه منتسمتعش بالحاجة اللي ياما حلمنا بيها وما صدقنا بقت بين ايدينا

ليه مش بنديها قيمتها اللي لازم تكون ليها

غريب يا ابن ادم فى الدنيا ملعون

تلف الايام وتفضل ابن فرعون

لا عرفت انت مين

ولا عرفت ان نهايتك هي الجنون

على الناصية

أهلا وسهلاً اعزائي مشاهدين برنامجنا البلوجي على الناصية

ومعكم من أسرة الإذاعة أستاذ سمسم

النهاردة ذى ما احنا شايفين وواضح فى بوستر البرنامج أننا بنتكلم عن العطاء فى الحب

وإلى أي مدى ممكن يوصل هذا العطاء

معانا النهاردة ضيفة جديدة وعزيزية على البرنامج

معانا أم أشرف اللي ما بينها وبين أبو أشرف قصة حب خلدت على مدار الزمن

هيطول ما بينا الكلام واكيد مش هنكتفي بحلقة واحدة علشان نحكي ونستفيد من خبرات ام أشرف فى الحب وكل ما يتعلق بيه

منورة معانا يا أم أشرف

ده نورك يا استاذ سمسم

طبعا سمعتيني فى بداية البرنامج كنت بتكلم عن الحب والعطاء فى الحب

كنت عاوز اسمع رأيك بخصوص موضوعنا النهاردة يا ام اشرف

شوف يا سمسم الحب ده معنى سامي اوي يعني لا احمد ولا ابراهيم

بضحك وياك كركركركركر

هههههههههههه

حقيقي عاوزة اقولك ان الحب بقى مصطلح قليل اوي لما نلاقيه على ارض الواقع دلوقتي

بقى عبارة عن كلمة بنقراها فى الروايات وقصص الحب

وفين وفين لما بنلاقي قصة حب كاملة وماشية تمام

علشان كده لما بنلاقي الحب لازم نمسك فيه وندافع عنه بكل ما نقدر عليه

ومن هنا بيجي الحب والعطاء والتضحية وانا شيفاهم كلها مسميات لمعنى اسمى وهو العشق

انك تعشق اللي بتحبه لدرجة تخليك متقدرش تعيش من غيره

ده هيخليك تعرف قيمته وتحافظ عليه على اد ما تقدر

وتديله كل حاجة نفسه فيها وكل حاجة تقدر تدهاله وتتعب علشان تديله لو مش قادر

ومن هنا بيتوجد العطاء

ومن هنا بيتوجد الحب

ومن هنا انا بتكلم يا سمسم

مش عارف اقولك ايه بصراحة يا ام اشرف بس انتي غطيتي عليه انا مش هلاقي كلام اقوله بعدك

كل اللي اقدر اقوله انك اديتي الحب حقه اوي فى كلامك

فعلا يا ام اشرف الحب بقى شئ نادر أوي فى زمانا ولازم نمسك فيه اوي لو عطرنا فيه

ووقتها العطاء هيجي لو حسينا بقيمة الحب وانك تربط حياتك بحياة شخص تاني

بس يا أم أشرف انتي مش معايا ان احيانا فى ظروف بتتوجد او بتكون موجودة اصلا بتحول ان البنى ادم يدي للي بيحبه كل حاجة هو عاوزها

ياريت اسمع رأيك بخصوص الحكاية دي

انا قولت يا سمسم بس انت مش اخدت بالك اننا لازم نتعب علشان ندي اللي بنحبه كل اللي هو عاوزه

ومن هنا بيجي معنى التضحية من اجل العطاء والحب

وذى ما قولت ان كلها مسميات لحاجة واحدة

ان مكنش فى تضحية وتعب علشان الطرف التاني يبقى كل حاجة بتيجي سهله

واللي يجي بالساهل بيروح بالساهل

إنما لو فى تعب وتضحية من اجل العطاء والحب ده

أكيد ساعتها مش هنفرط فى حاجة احنا تعبنا فيها وشقينا

معادلة واللي يفهمها هيكسب كتير فى الدنيا دي

الكلام معاكي ميتشبعش منه يا أم اشرف مش عارف اقول ايه بعد الكلام اللي انتي قولتيه ده

بس تصدقي ان كل كلمة بتقوليها حكمة لازم تتجمع وتتحط فى كتاب ونسميه حكم أم أشرف

كلامك مش مستاهل أنه يتنقد لان هي دي القيم المثلى فى الحب واللي لازم علشان نحب نمشي عليها ونبقى عارفينها كويس اوي

مينفعش الكلام ما بينا يقتصر على حلقة واحدة علشان كده بنوعد جمهورنا الكريم بسلسلة من الحلقات مع أم أشرف فى برنامجنا على الناصية

ده شرف كبير يا سمسم انا مش قده الكلام ده انا مش اقدر عليه

الشرف لينا يا ام اشرف كلامي ايه اللي بتقوليه ده

وربنا يخليكي لينا ويخليكي لجمهورنا الجميل ده

وميرسي ليكي يا أم اشرف على تشريفك بحضورك برنامجنا المتواضع

ميرسي ليك ولجمهوري الكبير واتمنى اني كنت ضيفة خفيفة عليكم

ده اكيد يا أم اشرف انتي حبيبتنا كلنا

والآن ننتقل لإذاعة خارجية بالقمر الصناعى من جمهورية سمسم المتحدة

من ستاد سماسم

لنقل فعاليات احتفال بطولة الامم السمسمية

وبعدها مباشرة ننقل لكم مباراة منتخب سمسوم مع غريمه اللدود منتخب جي جي

وشكراًاًاًاً

كان معكم

سمسم

والسلام عليكم ورحمة الله وبركاته

إطلع بتتر سمسم سمسم يحيا سمسم يبني

قلبي

قلبي المسكين

ترآى لي أن أكتب عن قلبي الذى طالما ينال العذاب

أتهمت بالكدب والخيانة والبعد عن الأحباب

أتهمت يا قلبي وما لك أن ترد عن أى اتهام

قصتي قصة حياة

قصة قلب عاشق داب من الفراق

قلب غذائه الحب وما نال إلا البعاد

قلب شريد وحيد

حوله من الاحباب ما لذ وطاب

لكن يا قلبي كتب عليك حب زهور الريحان

فتلذذ بحبها وبعذابها

وانكوي بنيرانها وتآلم بأشواكها

فهذا ما رضيت لنفسك واخترت

من بين قلوب الاحباب

أليس هذا ما أخترت لنفسك شريكا فى جنة الخلد جنة العشق والهيام

تلذذ يا قلبي بما اخترت وشيد يا قلمي على مر الزمان

شيد ما قد أمر به من حب وعشق وبعد وفراق وعذاب وآلام

شيد وأحتسب لي من كل ذلك مقدار حبي لزهور الريحان

ألك يوماً يا قلبي يعم عليك جو الفرح والسعادة بنور البيان

ألك يوماً تحقق فيه الأحلام

حلماً لطالما عشت له من الأيام أيام وأيام

حلمأ لطالما سهرت من أجله ليالي على مر الزمان

ذاك هو قلبي

فيا لقلبي المسكين